E to’alima tagata e aofia ai alii e to’atolu ma tamaitai e to’alua ua latou maua ni faailoga faapitoa mai le matāgaluega o leoleo, falepuipui ma le toe fuata’ina e amana’ia ai le latou galuega fesoasoani na mafai ona toe maua ai pagota e to’alua na sosola mai le falepuipui i Tanumalala i ni vaiaso e le’i mamao tele atu.
E pei ona silafia o pagota ia o Lauititi Tualima ma Aniseko Vaelei lea na maua le isi i Ululoloa ae o le isi na maua i Vaiusu.
Faaalia e le matāgaluega lo latou faafetaia o ia tagata i le lagolago atu i sa’iliga a leoleo aemaise foi o le faafetai i le auaunaga a leoleo o le malo o Ausetalia faapea se leoleo sinia o lea malo o loo galue i Samoa, o loo fesoasoani malosi foi i le matāgaluega.
E lima afe tala le taui na folafola e leoleo e maua e se tagata e tuuina atu faamatalaga e maua ai pagota e to’alua na sosola.
