I le amata usuia ai i lenei vaiaso o le koneferenisi a le auuso fealofani poo tinā o le Ekalesia Metotisi i Samoa ma atunuu i fafo, o se tasi o vaega tāua o lea faatasiga tele i tausaga uma i le masina lenei o Iulai, o le faafetaia e le Pelesetene aoao o le ekalesia o le galuega tautua a tinā o le ekalesia ua aulia tausaga e fitusefulu o le soifua.
O le tausaga nei i le koneferenisi a le auuso fealofani e silia i le 70 tinā o le Ekalesia Metotisi e aofia ai faletua o faifeau ua mālōlō manumālō, ua latou ausia ia tausaga e tele o le soifua.
O le faafetai lea a le Pelesetene aoao i lo latou sao tāua i le atina’e o le ekalesia i soo se tautua ma auaunaga.
O le amana’ia o lea tautua na tauaao ai pine ma meaalofa mo i latou ua taunuu le matua o le soifua i le 70.
O tinā o le ekalesaia ua aulia ia tausaga e tele o le soifua e mai sinoti i Samoa, o Ausetalia faapea ma Niu Sila.
O le vaiaso fou pe a mae’a le koneferenisi a le auuso fealofani e usuia ai le koneferenisi tele a le Ekalesia Metotisi e pei ona auai usugafono a sinoti i Samoa, o Amerika Samoa, Niu Sila, Ausetalia ma le Iunaite Setete o Amerika.
