O le sauniga o le faatautoga o tamaitai e toalua ma alii e toatolu ua aloaia e avea ma loia faamauina a le malo o Samoa i le aso ananafi i luma o lana afioga i le Faamasino Sili, Satiu Simativa Perese.
O i latou e aofia ai le sui komesina o le Matagaluega o Leoleo Papalii Monalisa Tia’i Keti, komesina lagolago o Galumalemana Eneliko Taeumasepau, Leoleo Asiasi o Apaula Taeu, Levaula Agassi Harry Titimaea ma Junior Hensley Gerard Gerae.
I le saunoaga a le Faamasino Sili na ave ai lana faamalo ia i latou i lo latou onosai a o feagai ai ma aoaoga aemaise o luitau sa fetaiai ma latou.
Sa faamalo faapitoa i sui e toatolu o le Matagaluega o Leoleo ona o lo latou finau ina ia iu ma le manuia lo latou faamoemoe, ae lē gata i lea o latou tiute tauave e lē gata i totonu o le Metagaluega ae faapea foi o latou aiga.
E lē gata i le tamaitai sui komesina ae faapea alo e toalua o le Fofoga Fetalai o le Maota o Papalii Li’o Ta’eu Masepa’u, le alii komesina lagolago o Galumalemana Eneliko Ta’eu Masepau ma le tamaitai Leoleo Asiasi o Apaula Ta’eu.
Faaalia e Papalii i lana faatalanoaga ma le TV1 le tele luitau sa feagai ma ia a o taumafai mai, ma na tau lagona ai lava le faavaivai.
Ta’ua e Papalii o le tausaga e 2016 na amata mai ai ana taumafaiga, ma o se itu foi na ia faaalia le lagolagosua malosi ai o lona aiga aemaise o le Matagaluega.
Faaalia e Papalii o avanoa mai le malo o Ausetalia e tauala atu i la latou faigapaaga ma le Ofisa o Leoleo a lea malo lea ua mafai ai ona faatino aoaoga ma ua iu ma le manuia ai.
O Papalii e sau mai afioaga o Sapapalii ma Magiagi, e fai lona aiga ma e toafā ona alo, o se tamaitai muamua lea ua ia umia le tofiga o le sui komesina i le Matagaluega o Leoleo ma Falepuipui, ma ua silia ma le 20 tausaga talu ona galue i totonu o le Matagaluega.
