Ua aloaia siitaga na sau ma le uluai aso o Aperila.
A o amata lenei tausaga faaletupe, o le Aso Toonai lea na aloaia ai le sii o le totogi maualalo i le $1.50 sene ma o lea ua $22.70 ai nei i le itula.
O tupe foi a tagata matutua poo le penisione o lea ua faaopoopo le silia ma le $100 e maua i totonu o le lua vaiaso a le ulugalii o loo maua uma a la penisione, ae latalata i le $70 mo le tagata tala penisione e toatasi.
O penefiti autu ua tuu i luga ia faafetaiai ai le inflation poo le taugata o le soifuaga ua iai nei, ma o lona uiga o le a maua le isi faaopoopoga e $40 i le vaiaso mo matua o loo maua penefiti ae o loo iai foi faanau, ae o le matua nofotoatasi o le a maua le isi $31.83 i le vaiaso.
O tupe foi o loo maua e fanau aoga o lea foi ua faaopoopo le tusa ma le $20 i le vaiaso.
Ae mo tupe o loo fesoasoani mai ai le malo mo le vaaiga o fanau poo le childcare subsidy o lea ua tuu i luga le faatapulaa o tupe maua e agavaa ai matua.
E tusa ma le 1.4 miliona tagata Niu Sila o le a penefiti mai nei siitaga.
