O le 16 o tagata palota o le itumalo faapalota o Falealupo sa fesiligia lo latou agavaa e lesitala i le lola palota a lea itumalo mo le faigā filifiliga aoao a le atunuu i le faai’uga o le masina nei, ua aloa’ia nei lo latou agavaa o ni tagata palota o lea itumalo.
O le taunuuga lea o le fofogaina o lea lu’i sa faaulu e nisi o tagata palota o Falealupo, peita’i o le valaauina mo le taimi muamua o le lu’i lenei i le Faamasinoga Faaitumalo i le vaiaso ua mavae, sa toe faaui ai i tua e le itu na talosaga ina ua mae’a se iloiloga ma faamautū ai o lea sefuluono o tagata palota e agavaa e lesitala i le faigā filifiliga a lea itumalo.
E pei ona silafia e 96 tagata palota mai Falealupo sa fesiligia lo latou agavaa ma faapena ona faia iai se iloiloga ma faamaonia le agavaa o le to’a valusefulu ae totoe ai le sefuluono sa faaauau pea ona fesiligia lo latou agavaa.
Peita’i o lea ua aloa’ia nei lea to’a sefuluono o nisi o le ‘aupalota ua lesitala faaletulafono mo le faigā filifiliga a lea itumalo palota i lo tatou motu o Savaii.
O Falealupo ua faamauina o se tasi o itumalo e lē oo i se afe le aofa’iga o tagata palota i lana lola mo le faigāpalota o loma nei.
E na o le 844 tagata palota ua lesitala ai.
