O le matāupu e faatatau i le ono faanonofo o tagata Palesitina mai le Gaza Strip i South Sudan poo se isi nofoaga, ua lapata’i ane ai Aikupito ia Isaraelu o le laina lanu mūmū lea ma o le a lē faatagaina e Aikupito lea tulaga ona o le puipuiga o lona atunuu e pei ona saunoa iai le minisita o le va i fafo mai Aikupito, Badr Abdelatty.
I se faatalanoaga na faia ma le CNN na ta’ua ai e le minisita lea, o loo galue nei Aikupito i le sa’iliga o se tonu e faamāmā ai le avega i tagata Palesitina o loo feagai ma mafatiaga ma o le aveesea mai o se vaega to’atele o tagata Palesitina mai Gaza o le a lē faatagaina e lona atunuu.
E le’i faailoa manino maia lava e Isaraelu le faatinoina o ana fuafuaga e pei ona aofia ai tagata Palesitina ia mai Gaza ae ua lipotia o loo gaioi le Palemia, Benjamin Netanyahu i le faatinoina o lea tulaga.
O Aikupito na pau lea o le auala e aga’i ese ai tagata mai Gaza i isi vaega o le lalolagi ona o lea ua poloka e Isaraelu le isi itu.
O lapata’iga la mai Aikupito ua ta’ua e le CNN o nisi ia o faamatalaga malolosi ua faia faasaga ia Isaraelu i ni nai vaiaso talu mai talanoaga na faia mo se filemu o Gaza ma e lē o faamauina se tali iai a Isaraelu.
O Aikupito le atunuu Alapi muamua na amana’iaina ma faatāua Isaraelu i le tausaga e 1979.
Pau le faamatalaga o loo ta’ua mai e le Palemia o Isaraelu e faapea, o loo faia faatalanoaga i le taimi nei ma atunuu e ono ave atu iai tagata Palesitina ia mai Gaza.
Puna o Faamatalaga: https://edition.cnn.com/2025/08/18/middleeast/mass-displacement-palestinians-from-gaza-a-red-line-for-egypt-foreign-minister-warns-intl
