Na faagasolo se asiasiga faalesoifua mālōlōina i totonu o le Maketi i Fugalei i le Aso Toonai, aso 5 Aperila 2025, ina ia faamautinoa o loo mamā ma tulaga lelei vaega uma ma fale o loo faaaogā e le mamalu o le atunuu i lea vaega o le taulaga.
O le Minisita o le Soifua Mālōlōina, le afioga ia Valasi Luapitofanua Toogamaga Tafito Selesele na ta’imua i lenei asiasiga, ma sa auai faatasi ma isi foi minisita o isi matāgaluega e pei o le Minisita o Leoleo, le afioga Faualo Harry Schuster, Minisita o Puna’oa Faalenatura ma le Si’osi’omaga, le afioga Toeolesulusulu Cedric Schuster, ma le Minisita o Faalapotopotoga a le Malo, le afioga Leatinuu Faumuina Wayne Sooialo.
Sa auai faatasi ai foi ma Ofisa Sili o nei uma matāgaluega faapea ma le Faalapotopotoga o Taui mo Faalavelave Faafuase’i le ACC, ma latou asiasia ai vaega eseese o loo faatinoina ai galuega i totonu o le Maketi i Fugalei.
O vaega uma na aga’i iai le asiasiga o le faaaogāina tatau o nei aseta a le Malo, le faatinoga o auaunaga o loo tautuaina ai le mamalu o le atunuu, le nofoaga o loo faatulaga ai falelēta’ua, aemaise foi le auala o loo puipuia ai le Maketi i Fugalei mai ta’ifau o loo taaloa solo ai.
