O se tasi o alii iloga foi i le taaloga o le lakapi liki ua faasee ane nei i le aufaigaluega (staff) a le Canterbury Bulldogs mo le tamilosaga o le tausaga fou 2023. 

O Roy Asotasi sa avea ma kapeteni o le Kiwi i taimi ua sola lea o le a faaopoopo atu i le aufaigaluega a le Bulldogs mo le tausaga fou i se tulaga part time.

Ua lipotia e le 9News i le aso ananafi o le lakapi o se tasi o taaloga e le o matuai toatele tele ni faiaoga e iai tupuaga Pasefika o galulue ai ma o le a fesoasoani le faaopoopo atu o Asotasi e tau faapaleni ai lea tulaga.

Ua faailoa e le 9News e toatele tama taaalo talavou mai le Atu Polenisia e fiafia ia Asotasi.

Sa taalo o ia mo le Kiwis ma Samoa ma ua loa tausaga o taalo i le NRL i le kalapu a le Bulldogs ma le Rabbitohs ma ua silia ma le 200 ana taaloga a o lei faamae’a lana taleni i Egelani. 

Fai mai se faamatalaga ua faailoa e Asotasi e fesoasoani i le atinae o tamaiti i le taaloga ma le polokalame a le Academy ma o se itu ua faafiafiaina ai le pulega o le kalapu i lona toe foi ane.