Ua silia i le 800 tagata ua maliliu ma le faitau afe o loo manunu’a i le mafui’e na aafia ai Afghanistan i le amataga o lenei vaiaso.
Fai mai le lipoti aupito lata mai a le BBC o le po anapo na momoe ai tagata i nofoaga i fafo mai o fale a o faagasolo pea galuega lavea’i.
Fai mai o le to’atele o le ‘aumaliliu e mai nofoaga maugā e pei o le itumalo o Kunar sa aupito latalata i le ogatotonugalemu o le mafui’e.
O loo faapea mai leoleo e ono siitia pea le numera o le ‘aumaliliu a o faia ai pea sa’iliga ma galuega lavea’i.
Ua iai atunuu ua ofoina atu fesoasoani mo Afghanistan ma o isi foi nuu e lē o mafai ona oo iai ni taavale ae ua matua’i faatumulia falema’i.
O le lipoti a nisi ua ta’ua ai ua atili faatetele aafiaga ona e le’i mamao atu foi sa lolovaia ai nofoaga lava ia ma iai sologa eleele ma poloka ai ma le tele o auala.
O isi atunuu ua faailoa le oo atu o fesoasoani e aofia ai Saina, Initia, UK ma Switzerland.
Puna o Faamatalaga: https://www.bbc.com/news/articles/c3ezgy1zlvwo
