Ua vaaia mo le ulua’i taimi le siitia o le aofa’i o tamaiti e lē o lelei le tulaga o mea’ai o loo maua i Afghanistan e pei ona faailoa i lipoti a le CNN se faamatalaga mai le World Food Program ma ua faailoa ai e mana’omia le 539 miliona e fesoasoani ai i aiga i le atunuu ua iai i tulaga ma’ale’ale.

Pe ā ma le 10 miliona tagata, tusa lea ma le kuata o le faitau aofa’i o tagata i Afghanistan o loo feagai ma faafitauli i taumafa ma ua faailoa e le World Food Program e iai le sootaga o le tulaga lea i le faaitiitia o fesoasoani tau taumafa mai le lua tausaga talu ai ona o le faaitiitia o le lagolago i lea polokalame.

Manatua foi o le masina o Aperila na faamuta ai le fesoasoani a Amerika mo Afghanistan i mea’ai ae o le atunuu lea sa numera tasi i le tuuina atu o fesoasoani faapea mo Afghanistan.

Puna o Faamatalaga: https://edition.cnn.com/2025/08/04/asia/afghanistan-child-malnutrition-surge-intl-hk