O le nofoaga o le S.P.A.C.E. Performing Arts Studio i Fugalei o le a maimoaina ai i le afiafi o lenei Aso Lulu i Samoa le ulua’i faaaliga a se tagata Iapani e talenia i le siva a lea atunuu ua ta’ua o le BUTOH.
O se siva e faifai lēmu ona taga e pei ona faailoa i se pepa o faamatalaga mai le ofisa o le malo o Iapani i Samoa, e fegaua’i lima ma vae i le faatinoga ae momoli ai se tala o le faanoanoa i sē sa pele ua fai i lagi le folauga, poo se tala o ni lagona ua faagaeetia.
O le afea o Samoa e lea tagata siva mai Iapani o Akihito Ichihara o le a avanoa ai le atunuu e fia silafia atili lona tomai e a’oa’oina lea ituaiga o siva.
O se avanoa foi o le a faasoa mai ai lea tu ma le aga a Iapani e ala i lea siva mo le soifua a’oa’oina o tagata i Samoa ma mafai ai ona fetufaa’i ma nisi o lo tatou atunuu e iai o latou tomai ma taleni i siva.
O le afiafi o le Aso Toonai nei e taualuga ai le faaaliga o le siva BUTOH a Akihito Ichihara i le maota Samoa o le Iunivesite Aoao o Samoa i le Papaigalagala.
