Ua faatupulaia pea le sosola o tagata faigaluega faavaitaimi ma galuega i totonu o Ausetalia sa latou osi feagaiga i le sainia o konekarate.
O le molimau lea a le faauluuluga o le ofisa o le iuni a tagata faigaluega i Samoa sa auai i le fono faaletausaga a atunuu o le Pasefika o loo aofia i le polokalame o galuega faavaitaimi i Niu Sila ma Ausetalia.
Faaalia e le faauluuluga i se talanoaga a o iai i Ausetalia i le aai o Brisbane mo lea fonotaga, o Samoa lava ia o loo fulisia tagata sosola ia i latou o loo maua le avanoa i galuega ta’i 3 ma le 4 tausaga le umi.
E lē tasi se mafuaaga o loo mafua ai lea tulaga, ma ua faaalia ai e le faauluuluga o le ofisa o le iuni a tagata faigaluega i Samoa le susuga Seveaoga Saina Tomi Faaseu Lauvale, o le tāua lea o faiga faavae fou a le malo ua iai nei, o le ave i Fono Faavae a itumalo e iloilo ma sa’iliili lelei ai tagata e fia maua ia galuega.
Faaalia foi e le faauluuluga o le ofisa o le iuni a tagata faigaluega a Samoa ia Seveaoga Saina Tomi Faaseu Lauvale, o le fonotaga na auai sa maua ai le avanoa latou te asia nisi o nofoaga o loo galulue ai nisi o tagata mai Samoa i galuega faavaitaimi i Ausetalia.
O le tasi o itu sa molimauina ai o nofoaga o loo faamautū ai i latou.
O se finagalo o le faauluuluga o le ofisa o le iuni a tagata faigaluega i lo tatou atunuu le Samoa First Union, le susuga Seveaoga Saina Tomi Faaseu Lauvale.
