Ua toso le taofilima i se faai’uga a le malo o Niu Sila ua amata i le vaiaso nei e pei ona taofia lē tumau ai le toe vaetama atu o tagatānuu o nisi o atunuu i tagatānuu o Niu Sila, ma ua faaalia ai i se lipoti a le Pacific Media Network, o Samoa le tasi o atunuu o le a aafia tele ai i lea faai’uga.
Faaalia i lea lipoti ua māfua ona faia lea taofiga mo se taimi ona o atugaluga o le malo o Niu Sila i fanau o loo vaetama atu i nisi o tagatānuu o Niu Sila ae ua aafia ai i ni faiga tau sauāga poo child abuse.
Ua faaalia se finagalo o le Minisita lagolago o faamasinoga a Niu Sila i lea lipoti ma ia faailoa ai o loo iai se taumafaiga i le taimi nei e feutaga’i ma sui o le malo o Samoa e faatatau i le matāupu ua ōia ai vaegatama poo adoptions ae se’i vaganā ua mautū se ta’otoga o lea tulaga ona faato’ā toe iloa lea o le isi laasaga.
E tusa ma le tasi le afe fanau e vaetama atu i tagatānuu o Niu Sila i le tausaga, peita’i e lē o iloa pe fia tonu le aofa’i o fanau o loo sauāina e i latou ua vaetamaina.
