Ua faaauau ona nofo taofia pea i le falepuipui i Tanumalala le susuga Fiu Sikuka Lomitusi lea sa loka i se tusi saisai i le lē tula’i i le Faamasinoga Maualuga e tali ni moliaga tau nakoti poo fualaau faasāina, a o afea ai Samoa mo ni matāupu tau i lona aiga.
O loo molia foi Fiu e iloa i lana itulau faasalalau i le api o foliga o Tama o le Eleele i ni tagi ua faaulu faasaga i ni ana faasalalauga taufaaleaga i luga o lea fesoota’iga faaonaponei.
O le Aso Gafua na tula’i ai Fiu peita’i e le’i oo le faila o moliaga a leoleo i lana loia e pei ona sa faatonu e le faamasinoga i le valaauga o le matāupu i le Aso Gafua o le vaiaso ua mavae.
Na fesiligia ai e le faamasino le loia a leoleo pe aisea ua lē avea ai le faila, ae sa na o le faamālūlū o le loia i le faamasino.
Ua fautuaina ai le loia a leoleo e le faamasino le afioga Fepuleai Ameperosa Roma, a fai atu loa e ave le faila ona faataunuu lea o le faatonuga.
O loo iai le talosaga a le loia mo lē ua molia e tatala i tua, ae faato’ā tagofia pe a toe tula’i Fiu Sikuka Lomitusi i le Aso Gafua o le vaiaso fou.
