O le asō Aso 28 o Tesema 2021 e atoa iai le 92 tausaga talu ona tagatavaleina le afioga i le Tama Aiga Tupua Tamasese Lealofi III ma nisi o sui o le Mau.
O le Aso Toonai 28 o Tesema 1929 na tulai mai ai lea faalavelave matautia ma masoe ai le Tama Aiga ina ua faaaoga e se leoleo Niu Sila le fana tavili a’o savavali le solo tele a sui o le mau ina ua maea ona o latou faafeiloai i le uafu i Apia e toe foi atu i le atunuu ona o latou sui lagolago sa faaaunuua i Niu Sila sa faaigoa ai lea aso o le Aso Toonai Uliuli poo le Black Saturday.
O le tasi lea i pine faamau ma o se tasi o tala faasolopito e le mafai ona galo i pulega faakolone sauā a Niu Sila i Samoa i tausaga ua mavae a’o le’i tutoatasi le atunuu.
O loo lagomau le Tama Aiga i lona Tiamaa i Lepea lata i le alatele autu ma o loo avea pea ma tala faamanatu i le atunuu aemaise o tupulaga lalovaoa o Samoa.
