I le aofa’iga e 51 o itumalo faapalota o le atunuu lea e 20 i Savaii ae 31 i Upolu, ua silia i le selau pasene le aofa’iga o tagata agavaa e palota i itumalo e iva ua mae’a faatino a latou lesitala.
O le faamaumauga lata mai i le ofisa o le komisi o faigapalota i Mulinuu ina ua mānava le galuega o le lesitala i le 4 o le afiafi o le Aso Toonai na te’a nei.
Peita’i e ui ina ausia lea tulaga lelei i le lesitala mo ia itumalo faapalota e iva, faapea le tele o isi itumalo ua ausia le 50 e oo i le 90 ma ona tupu pasene, o loo pito maualalo pea le aofa’iga o tagata palota i le itumalo o Faleata 3 ua mae’a ona lesitala.
Ua faaalia i faamaumauga lata mai o lea faato’ā ausia e lea itumalo le 45 pasene o tagata ua lesitala.
O le aofa’iga o tagata palota e tatau ona lesitala mo lea itumalo e tusa o faamaumauga a le ofisa o faigapalota e 4,945 peita’i e na o le 2,230 ua mae’a fai a latou lesitala.
E 2,715 tagata o lea itumalo e le’i aga’i lava e fai ni lesitala.
Mo le silafia e le atunuu ua toe lesitala uma tagata palota o itumalo faapalota e 51, o lona uiga e lē toe faaaogāina le lesitala sa faia i le taimi a o lumana’i le palota tele ua mavae lea sa faia i le tausaga e 2021.
O itumalo e iva ua silia i le selau pasene le numela o tagata palota ua lesitala, o Gagaifomauga 2 e 124 pasene, o le aofa’iga o tagata palota e 1,120.
O le numela o tagata palota ua mae’a lesitala e 1,394 ua iai le faaopoopoga, toe 274 tagata e le’i faia lesitala.
O Gagaifomauga 3, 121 pasene, aofa’iga o tagata agavaa e palota e 778, tagata ua mae’a lesitala e 945 ua iai foi le faaopoopoga, toe 167 tagata palota o lea itumalo e le’i lesitala.
O Gagaemauga 2 ua 115 pasene, aofa’iga o tagata i le latou lola palota e 925, o i latou ua mae’a lesitala e 1,064 ua iai le faaopoopoga, tagata e le’i faia lesitala e 139.
O le itumalo o Vaa o Fonoti e 817 le aofa’i o tagata palota talu mai le tusigaigoa o le 2021, ua ausia le 117 pasene o i latou ua lesitala i le aofa’iga e 955 ua iai le faaopoopoga, tagata e le’i lesitala e 138.
O Falealupo ua ausia le 119 pasene, aofa’i o tagata palota o loo faamauina e 612, i latou ua mae’a lesitala e 729 ua iai le faaopoopoga, tagata palota o Falealupo e le’i faia ni lesitala e 117.
O Gagaifomauga 1 ua ausia le 111 pasene, aofa’i o tagata i lana lola palota e 790, tagata ua mae’a lesitala e 875 ua iai foi le faaopoopoga, tagata palota e le’i lesitala e 85.
O Falealili 2 o le aofa’i o tagata palota i le lola a lea itumalo e 771, o i latou ua mae’a lesitala e 852 ua iai le faaopoopoga, tagata e le’i lesitala e 81.
O Vaisigano 2 ua ausia le 108 pasene, aofa’iga o tagata i lana lola palota e 881, tagata ua mae’a lesitala e 955 ua iai le faaopoopoga, tagata e le’i faia lesitala e 74.
O le itumalo lona iva ua silia foi i le selau pasene ua ausia o lana lesitala o Satupaitea e 102 pasene, aofa’i o tagata palota i lana lola e 1,052, tagata ua mae’a lesitala e 1,072 ua iai foi le faaopoopoga o tagata palota ua lesitala i lea itumalo, tagata e le’i faia ni lesitala e 20.
Ua molimauina foi i faamaumauga lata mai nei, e fitu itumalo palota e lē o toe oo i se selau tagata e le’i lesitala.
O ia itumalo faapalota e aofia ai Lepa toe 40, Palauli 3 toe 41, Aleipata Itupa i Luga toe 46, Vaisigano 1 toe 63, Faasaleleaga 3 toe 64, Siumu toe 89, ma Alataua i Sisifo toe 96 tagata palota e le’i lesitala.
O ia fuainumela o loo fua i le aofa’iga o tagata palota mo ia itumalo mai le taunuuga o le tusigaigoa o le tausaga e 2021.
Ua oo atu nei i le 23 tagata palota i atunuu i fafo ua mae’a a latou lesitala i le faamalieina o aiaiga mana’omia, ma o faamaumauga uma nei a le Komesina ma le ofisa o le komisi o faigapalota talu mai le ta o le 4 o le afiafi o le Aso Toonai na te’a nei.
Talu mai foi lea faamaumauga ua faamauina nei le oo atu i le 86,077 tagata palota ua mae’a faatino a latou lesitala ae 117,225 le aofa’iga e tatau ona lesitala e palota i le faiga filifiliga ia Aokuso.
E tapunia le lesitala o tagata palota i le Aso Tofi o le vaiaso a sau i le ta o le 4 i le afiafi, lona uiga o le vaiaso atoa lenei Aso Gafua i le Aso Toonai, faapea le Aso Gafua o le vaiaso a sau se’ia oo i le Aso Tofi le aso 3 o Iulai o loo maua ai pea le avanoa.
Ua faamanatu mai pea e le Komesina o faigapalota le faasalaga tupe e 2 afe tala e totogi e le tagata e lē faia se lesitala ae ua agavaa e palota.
Ua faamanatu foi e le ofisa o le Komisi o faigāpalota i sui tauva uma, ma nisi o fesoasoani i a latou tapenaga o se solitulafono le la’u o tagata e fai lesitala, poo le faatino o se isi lava auala ma le faamoemoe e faatino ai le lesitala o se tagata ua agavaa e palota.
