O polokalame a le auaunaga ua ta’ua o le Pacer Plus o loo iai totonu malo o le Pasefika faapea Niu Sila ma Ausetalia, ua fesoasoani malosi i le gaosia o oloa mai fua tau faato’aga e ala i se foa’i o masini eseese mo le gaosia o isi oloa mai laau tau faato’aga e pei o le koko, kofe, faapea ufi ma talo.
E 89 afe tālā le tau aofa’i o ia masini ua foa’i mo le asosi a le ‘aufaifaato’aga a Samoa poo le Samoa Farmers auā le saga una’ia o taumafaiga o oloa gaosi mai laau tau faato’aga e pei o chips e gaosi mai le talo.
O le Minisita o le malo tausi mo le Matāgaluega o Faato’aga ma Faigāfaiva sa ia tauaaoina atu i sui o le asosi a le ‘aufaifaato’aga a Samoa lea fesoasoani e aofia ai masini e faapa’u ai fatu koko mago ma puipui mai ai i le mu, masini faamalū palapala, masini e palu ai koko ma masini e vili ai le kofe.
Sa foa’i ai foi masini iliafi o masini e ‘eli ai lua mo pou o pa, ma isi masini e aogā i taumafaiga a sui o le asosi o faifaato’aga a Samoa.
O le autū o ia fesoasoani e pei ona faailoa e le Minisita le afioga Niuava Eti Malolo, ia una’ia le atina’e o le laueleele i le totōina o laau tau faato’aga.
