O tapenaga a le ofisa o le komisi o faigāpalota mo le palota tele a le atunuu i le masina fou o Aokuso ua faailoa ai e le Komesina o faigāpalota e tusa ma le 800 malu o le malo poo leoleo o le a galulue i le taimi o le faigā filifiliga a le atunuu aoao.
E ese mai lea aofa’iga i le tusa ma le tasi le afe fituselau tagata o le a galulue i le faagaioia o auaunaga eseese mo le faigāpalota, ma o loo faagasolo ai le taimi nei a’oa’oga mo lea aofa’iga o tagata faigaluega e to’atele lava ia i latou o loo galulue i auaunaga eseese a le malo.
Ua faailoa foi e le Komesina o faigāpalota le afioga Toleafoa Tuiafelolo Alexander John Stanley ua taunuu pusa palota mai Niu Sila ma o le taimi muamua o le a faaaogā ai ituaiga o pusa palota e mafai ona iloa atu ai pepa palota i totonu.
O pusa palota sa gaosia i le laupapa plywood sa faaaogā i le palota tele o le tausaga 2021 ua iai faaletonu e pei o le pala, ma ua lē toe faaaogāina.
