O le tala o le tupe e 1 tesimale 2 piliona tālā lea sa teena e le Palemene ma mafua ai ona faataape le fono aoao faitulafono ma tapena ai nei le isi faigāpalota aoao a Samoa, sa aofia ai nisi o fuafuaga tau tupe mo le siitia o le penisione a tagata matutua i le 300 tālā i le masina, ae 150 tālā mo tagata e iai aafiaga tumau.
Sa aofia ai ma le fuafuaga o se vaegatupe e silia i le 70 afe tālā mo taui o tagata taaalo e manumālō i pine auro, pine siliva ma pine apamemea.
Ua faaalia e le Minisita o Taaloga ma Alaga’oa mo le Fiafia o Tagata le afioga Laumatiamanu Ringo Purcell, o se vaegatupe sa fuafua mo taui o pine e manumālō ai tagata taaalo o le atunuu mai taaloga laiti a le Pasefika lea e faia i Palau i le faai’uga o le masina nei, faapea isi taaloga faavaomalo o loo faatulaga mo le isi 12 masina o lumana’i e fuafua lea i le tausaga faaletupe 2025 i le 2026 lea e pei ona iai le tala o le tupe sa tapena e le malo.
O le tasi lea o fautuaga sa tuuina atu e le faalapotopotoga o taaloga a Samoa le SASNOC i le malo, lea na talia ma faatulaga ai loa le vaegatupe mo taui o tagata taaalo lea ua lē maua ona ua teena e le Palemene le tala autū o le tupe mulimuli a le paeaiga faapalemene e 17 lea ua faamuta e le’i mae’a le lima tausaga.
