Ua amata tuli le faasalaga 13 tausaga i le falepuipui o se tamā ua 62 tausaga o lona matua, ina ua faamaonia ona moliaga o lona faia o ni solitulafono o le faiaiga faamalosi i se teineitiiti laitiiti sa 12 tausaga le matua i le taimi na aafia ai.
O le 13 tausaga lea o lona faasalaga ua tuli faatasi ai ma isi ona faasalaga e pei o le 4 tausaga faafalepuipui i le solitulafono o le faia o se fesoota’iga tau faiaiga ma se teineitiiti laitiiti, ma le 3 tausaga faafalepuipui i le solitulafono o le faaoolima matagā.
O gaioiga solitulafono na faia e lē ua nofosala sa faatino i le va o le tausaga e 2022 ma le 2024 ma o faamaumauga a leoleo o loo faailoa ai e sefulutasi gaioiga solitulafono na faatino e lē ua tapu e le faamasinoga ona faailoa lona suafa, ona o le puipuiga o lē na aafia.
O le faanoanoaga o le faamasinoga sa iloa e le tinā o le teineitiiti le gaioiga sa tupu aemaise o nisi o taimi sa alu lē ua faasalaina ma piki mai i le nofoaga sa faigaluega ai, peita’i o le aiga tuaoi na logoina leoleo ma taofia ai loa lē ua molia ma nofosala.
Ua taatia atu e le faamasinoga lea tulaga i leoleo pe faia iai se su’esu’ega ma ni moliaga i le tinā.
