O le kamupani taavale totogi pau poo le pisinisi o le Samoa Alofa Car Rentals e faagaioia i lo tatou atunuu, o lona faatonu poo se director o le faisea foi lea o le kamupani ma se isi tagata, ua faatonuina nei e le Faamasinoga Maualuga i sana faai’uga e toe faafoi ki o taavale rental e 62, ma totogi atu i ni tagata faipisinisi i Ausetalia se vaegatupe e tusa ma le 377 afe 300 tālā.
Ua faatonuina ai foi e le faamasinoga ma le totogi o le 30 afe tālā Ausetalia i le itu na tagi ona o le sao lea o lē sa molia i le nonogatupe na faia i Ausetalia e amata ai le pisinisi i Samoa.
O le kamupani o le mVoice Pty Limited, ma le kamupani o le Contextual Technology Pty Ltd i Ausetalia na faatonuina se ofisa loia tuma’oti i Samoa na te finauina i le faamasinoga le toe faaola atu o tupe ma nisi o seleni sa lē tausisia e paaga tau pisinisi a ia kamupani i lo tatou atunuu ona totogi, o ni faamanuiaga mai le faagaioia o le pisinisi taavale totogi poo le car rentals.
E iai se vaegatupe e tusa ma le 181 afe 695 tālā o le totogi o tiute o nisi o taavale sa aumai mai fafo mo le pisinisi sa finau le itu tagi e totogi foi e itu na molia, peita’i ua totogi nei e le itu tagi lea vaegatupe.
O tupe foi o le pisinisi o loo teu o ni trust funds i se ofisa loia i Samoa ua faatonuina e le faamasinoga le itu ua faasaga iai le tagi latou te totogia.
