E ono vaiaso o loo talosagaina ai le faamasinoga e le ofisa o le komisi o faigāpalota e faaopoopo ia latou tapenaga, mo le faigāpalota tele o loo loma nei.
Ua mafua lea talosaga ona ua faailoa e le Komesina o faigāpalota o le 3 masina o loo aiaia i le tulafono faavae e lē lava ona e le’i mae’a le galuega ua toe lesitala uma ai tagata palota mo lola a itumalo faapalota e 51.
Ua faailoa mai e le Komesina o faigāpalota le afioga Tuiafelolo Alexander John Stanley o le Aso Faraile le faai’uga o lenei vaiaso ua tuuina atu ai i le Faamasinoga Maualuga le tapenaga a le Loia Sili a le Malo ua talosagaina ai lea taimi faaopoopo.
O le amataga o le masina o Setema e mae’a ai le 3 masina o loo aiaia i le faavae pe a fua i le aso 3 o le masina fou o Iuni e faatā’ape aloa’ia ai le paeaiga 17 a le Palemene, ae a talia le ono vaiaso ua talosagaina e tatau ona mae’a le lesitala o tagata palota ia Oketopa ma aga’i loa ia Novema e tapena le lesitala o sui faatutū ma taunuu ai loa i se taimi poo le faai’uga o Novema i le amataga o Tesema o le tausaga nei e faatino ai le faiga filifiliga mo le toe sa’ilia o sui usufono o le Palemene.
O le taimi nei talu mai le Aso Lua o le vaiaso nei faato’ā maua le 60 afe o tagata ua mae’a ona lesitala peita’i e 117,225 tagata e tatau ona lesitala.
Faaalia e le Komesina o faigāpalota, o le tasi o tapenaga tele o meafaigaluega ma tagata e faatinoina le faigāpalota.
O le taimi nei ua faailoa e le afioga Tuiafelolo Alexander John Stanley le Komesina o faigāplaota, e lima vaega poo teams a le ofisa o le komisi o faigāpalota o loo galulue i Savaii e aofia ai le ofisa i Salelologa, ma ua molimauina suiga i le tumutumu atu iai o le atunuu mo le faia o lesitala.
O le vaiaso fou i Upolu o le a iai ni nofoaga faaopoopo mo le faia lava o lesitala, lea o le a faaaogā ai le faletaalo o le Multipurpose i Tuanaimato, ma le faletaalo tele o le taaloga soka i le Apia Park.
O nofoaga ia e ese mai le ofisa autū o le komisi o faigāpalota i Mulinuu.
