Ua faamaonia le faaopoopo ai o le numera o tagata ua pesia i le faama’i o le misela i totonu o Niu Sila, ma i faamaumauga mai le Matāgaluega o le Soifua Mālōlōina o lea ua oo atu le fuainumera o tagata aafia i le to’avalu, e to’alua e mai faaaitu o Wirarapa ma le to’atasi e mai Manawatū.
E tusa ai ma iloiloga, e 6 nofoaga fou o loo mata’itūina nei e le Matāgaluega i totonu o Feilding.
O nofoaga masalomia na asia e se tasi o tagata ua aafia i le misela i le Aso Faraile o le vaiaso na te’a nei.
O ia nofoaga e aofia ai se supamaketi, o se faleoloa e faatau ai ofu ma le tele i meatotino e foai e tagata (hospice second-hand shop) o le faleoloa o le Bunnings, o le Warehouse, o le Bargain World ma se isi o faleoloa e ta’u o le cut-price store.
Māua na asia e lē ua aafia i le faama’i ia nofoaga ma faleoloa mai le va o le 2 i le aoauli aga’i i le 5 i le afiafi.
Faamanino e le auaunaga o le soifua mālōlōina, o ma’i nei e maitauina e iai sootaga i le ma’i e pei ona ulua’i faamaonia i le amataga o Iulai i faaitu lava lea e tasi o Wairarapa, e pei ona faamanino mai na aafia mai i sana malaga i atunuu i fafo.
Faamauina i lipoti mai le Newstalkzb, na faanofoesea uma le to’atele ma e ta’ua e to’atasi lava le tagata e faapea na telē ona aafiaga mo si taimi.
Ua fautuina nei e le auaunaga a le Soifua Mālōlōina le mamalu o le atunuu na aga’i i nofoaga e pei ona ta’ua i Feilding, ina ia mata’itūina lelei faalogona o o latou tino, poo latou faalogoina ni āuga i le maua ai i le misela, e pei o le maualuga o le fiva, malosi le tale, tafe le isu tulou, tigā mata pe pata foi se mūmū poo se rash i le tino.
Ua fautuaina foi tagata lautele e le’i faia tuipuipui, ina ia aga’i loa e faatino lea vaega tāua.
Puna o Faamatalaga: https://www.newstalkzb.co.nz/news/national/wairarapa-measles-outbreak-spreads-to-manawat%C5%AB-3-new-cases-confirmed/
