A o lata ina mae’a ai taaloga laiti a le Pasefika o loo faagasolo i le atunuu o Palau lea o loo tausiniō ai Samoa ma isi atunuu e 23 o le Pasefika, ua faailoa i lipoti lata mai le saofa’i ai nei o Samoa i le tulaga 2 i le aofa’iga o pine auro ua ia maua e 27 ae tulaga muamua le ‘autaaalo a le atunuu o Tahiti e 53 auro ae ua 103 le aofa’iga o pine a lea atunuu ua maua.
O Samoa i le tulaga 2 e 59 le tuufaatasiga o ana pine, lea e 27 auro, 13 pine siliva ma le 19 pine apamemea.
O le aofa’iga e 59 pine a le ‘aumasii a lo tatou atunuu ua ausia, ua silia ma le numela e 49 sa folafola e le Pelesetene o taaloga a le atunuu e manumālō ai Samoa i ia taaloga.
O lea foi aofa’iga o a tatou pine e pito tele ai pine na manumālō ai le tatou ‘ausiisii u’amea mamafa e 28.
O taaloga laiti a le Pasefika sa faia i le aai o Saipani i le atunuu o le Atu Mariana i Matu i le tausaga e 2022, sa tulaga 8 ai Samoa i le aofa’iga e 21 ana pine e aofia ai pine auro e 8, 5 siliva ma pine apamemea e 8.
O le Aso Lulu o le vaiaso nei e tapunia ai taaloga laiti a le Pasefika o loo talimalo ai le atunuu o Palau i lenei tausaga.
Ae i le 59 o pine ua manumālō ai le ‘au masii a Samoa talu mai le Aso Sa muamua o Iulai o le fuafuaga sa iai a le malo, e tuuina atu taui tupe mo alii ma tama’ita’i uma o le atunuu e manumālō i pine amata i ia taaloga faavaomalo.
Peita’i o le teena o le tala o le tupe e le Palemene ia Me lea sa aiaia ai se vaegatupe mo ia taui, ua lē taunuu ai lea fuafuaga.
