E oo atu i le 10 tone le mamafa o laau faasāina o le maruana na maua ma taofia e leoleo mai ni o latou osofa’iga i totonu o Aukilani nei.
O se osofa’iga na faatulaga e taofia ai le tele o gaioiga solitulafono a le tele o vaega o loo faatulaga poo organised crime networks; ma e māua e masina atoa lava o faatulaga ma faatino sa’ili’iliga a malu o malo i taumafaiga e taofia nei laau faasāina mai le oo atu i tua i le lautele, ae o le taofia o nei tagata mai le faaauau ai o nei gaioiga.
I se pepa o faamatalaga mai le NZ Police, e 120 lelei fale na faaaogā e nei vaega e faaola ai le laau faasāina i nisi o nuu i tua ma nofoga e lalata i le taulaga (suburban and rural areas) ma e ta’ua o le tele o ia fale poo (cannabis grow houses) na faia faananā i fale mautotogi- o rental properties.
O lea galuega tele a leoleo ua faaigoaina o le Operation Beryl na faamanino ai, i totonu lava ia o Waitemata e 9 tone o maruana na maua, ae o isi osofa’iga i totonu o le taulaga o Aukilani ma Manukau na taofia ai le faitau selau kilokalama o maruana.
Ta’ua e leoleo o nei fale o loo faaaogā mo laau faasāina nei, e fai lava sina lē saogalemu e pei ona faailoa, o le tele o metotia e pei o le eletise e faaaogā e faatino faaalātua na faia faananā – ma e ono telē lava se aafiaga e tula’i mai ai e pei o le ono mū ai o le fale.
Talu ai nei aafiaga, ua fautuaina ai e leoleo i latou e onaina fale poo landlords ina ia mata’itūina lelei i latou e aga’i atu ma aumau i o latou fanua ma fale ma tautuanā le faia pea a latou asiasiga ina mautinoa e lē o faatino e i latou o nofo mau totogi ni gaioiga faasolitulafono e pei o le faaola ai o maruana i totonu o a latou lotoā ma fale.
Ua fautuaina foi e leoleo le mamalu o tagata lautele ina ia lipoti atu ni vaega o loo o latou masalomia o ni gaioiga faasolitulafono.
E 58 miliona le tau aofai o nei laau faasāina na maua pea faatusatusa atu i le tau e faatau ai i tua i le maketi.
