O le Aso Faraile o le vaiaso nei i le ta o le 2 i le aoauli e tatau ona oo atu iai ua totogi uma le sala tupe e limaafe tālā a se alii Tonga, o se pailate i le kamupani vaalele o le Talofa Airways, ina ua aumai le faasalaga a le Faamasinoga Maualuga faasaga ia Mikaele Paea Ha Lotu Mateo Halafihi e 27 tausaga lona matua.
O Mikaele sa ia ioeina moliaga e 3 o solitulafono o le faia o se fesoota’iga tau faiaiga ma se teineititi e i lalo ifo o le 16 tausaga le matua ma le solitulafono o le faia o ni gaioiga matagā.
O lē na aafia o se tagatānuu o Tonga e nofo i Aukilani i Niu Sila ae sa malaga i Samoa i le masina o Setema o le tausaga na te’a nei e asiasi i le ua faasalaina ma lona to’alua o se tama’ita’i Tonga ma le la fanau o loo faamautū i Samoa ona o lana galuega.
Sa tetee lē ua molia i moliaga a leoleo ae o Aperila o le tausaga nei na toe faaui ai i tua lana tetee ae ioe i moliaga e tolu ina ua mae’a se feutana’iga a lana loia ma loia a leoleo.
E ono masina e nofosala ai i le falepuipui Mikaele pe a oo atu i le Aso Faraile nei e le’i totogia uma lana sala tupe e limaafe tālā.
