O le Matāgaluega o A’oga ma Aganuu ua tuuina atu lana lagolago i tapenaga a le Komesina ma le ofisa o le komisi o faigāpalota i le tuuina atu o le 500 masini tapeleti poo tablets e faaaogā ai fesoota’iga televavave faatekonolosi mo le auaunaga i le taimi o le faigāpalota.
Ua faailoa e le Komesina o faigāpalota le afioga Toleafoa Tuiafelolo Alexandra John Stanley, le ofoina atu o ia masini o se faamāmā avega i tupe faaalu mo tapenaga ona ua lē maua le silia i le 3 miliona tālā sa fuafua i le tala o le tupe lea na teena e le Palemene sa faamoemoe e faatupe ai le faigāpalota a le atunuu i le tausaga fou, ae o lea ua faia i se tulaga faafuase’i.
O loo iai vaegātupe ua faatino ai ia tapenaga e ui i le le fea’ua’uta’i o le faasoa tau seleni, ma ua faailoa ai e le Komesina o faigāpalota i le mafutaga ma le ‘autusitala i lenei vaiaso o taavale e faaaogāina i le taimi o le palota, e ono fesoasoani atu ai nisi o matāgaluega ma faalapotopotoga a le malo.
O pusa palota o loo aumaia mai Niu Sila ua faamoemoe e taunuu i le faai’uga o le masina nei, ma tapenaga i tagata faigaluega e faaaogā mo le palota o le vaiaso nei sa faagasolo ai a’oa’oga mo i latou i Upolu ma le faamoemoe e faia foi le a’oa’oga i Savaii mo i latou o loo i Puleono i Salafai.
