O lea ua faamautū nei le lisi o suafa o sui tauva mo le faigā filifiliga aoao a le atunuu i le Aso Faraile o le vaiaso a sau ina ua mae’a faamasinoga o tagi sa lu’iina ai agavaa o nisi o sui sa lesitala e avea ma sui faatutū.
Ua faailoa faalaua’itele ai nei e le Komesina o faigāpalota lea lisi ma ua manino mai ai e na o le 50 itumalo faapalota o le a faatino a latou faigā filifiliga e toe sa’ili ai ni o latou sui usufono o le Palemene mo le isi lima tausaga o le paea’iga o sosoo ai nei.
I le lisi o suafa o sui faatutū o le vaega faaupufai o le Faatutua i le Atua Samoa ua Tasi e 52 o latou sui tauva, pito iai le vaega e puipuia aiā tatau a tagata e 47, vaega faaupufai o le Samoa ua Potopoto e 25 sui faatutū, o le Samoa Labour Party e to’aono sui tauva, sui tauva tuto’atasi e 50 ma patī faaupufai o le Tumua ma Pule ma le Constitutional Democratic Republic Party e ta’itasi o latou sui tauva.
O le aofa’iga o sui o le a faia iai le filifiliga a le atunuu e 182.
O le vaega e puipuia aiā tatau a tagata e tolu itumalo e lē o iai ni o latou sui tauva o Falealili 2, Lotofaga ma Vaisigano 1.
O le vaega faaupufai o le Samoa ua Potopoto e na o le 25 itumalo palota o le a tauva ai ona sui faatutū.
O le pati o le Samoa Labour Party e na o le ono itumalo o le a tauva ai, ma sui tuto’atasi e 26 itumalo faapalota o le a tauva ai.
Ua na o le 50 itumalo faapalota o le a toe sa’ilia ni o latou sui usufono o le Palemene i le palota tele, ona ua lē faia se filifiliga a le itumalo faapalota o Faleata 2 ona o tulaga ua taoto iai le faai’uga a le faamasinoga o faigāpalota.
