O le faafaigatā o le tapenaina o nisi o fanua ona o le soata ma tele le maa, i le fuafuaga e faato’a i laau tau faato’aga, poo le fausia ai foi o pa mo atina’e o manupapalagi, o lea ua taunuu le fesoasoani a le malo o Saina o le a fesoasoani i lea tulaga.
O le tamaitai Palemia o le malo tausi le afioga Fiame Naomi Mataafa na ia tauaao le foa’i a lea malo o masini mamafa ma loli faapea meafaigaluega auā le suaina o fanua mo le atina’e o lafu manu ma faato’aga.
E 5 miliona tala le tau aofa’i o lea fesoasoani e pei ona aumai ai masini uapato poo excavators e 5, o palau e 6, o loli pa’u ono e 5, ma loli pa’u sefulu e 5, faaopoopo iai ma meafaigaluega mo le faaaogāina o ia masini mamafa.
O le ulua’i seleselega a le itumalo o Vaisigano 1 talu ai nei na faailoa lautele ai e le Minisita o Faato’aga ma Faigafaiva lea fesoasoani a Saina, ae o le Aso Gafua o lenei vaiaso na tauaao ai e le Palemia ma faafetaia ai lea malo i le agalelei faifaipea mo le atina’e o Samoa.
Le Palemia o le malo tausi, afioga Fiame Naomi Mataafa i se vaega o lana saunoaga faafetai i le malo o Saina i le fesoasoani ua aumai ai ni loli ma masini mamafa e fesoasoani i le ‘aufaifaato’aga ma le ‘aufailafumanu a le atunuu.
