O le fitu aso ua tuanai na amata faitau i le aso 25 o Tesema e oo i le faaiuga o le masina faaiu o le tausaga ua tea atu nei 2023, na faamauina ai se siitaga i le numera o tagata i le atunuu na aafia i auga o le Koviti-19, le gasegase na pipisi i le lalolagi ma mafua ai tapu ma vavao a o tapunia tuaoi o atunuu uma o le lalolagi i le 3 tausaga ua mavae.
O faamaumauga lata mai ia a le matagaluega o le soifua maloloina ua faailoa lautele i lenei vaiaso a o amata ai le savaliga a Samoa mo lenei tausaga fou.
O le 44 lea o tagata ua maua i le koviti ua taunuu ai le aofaiga o i latou ua aafia i lona tuuaofaiga e 17,006 (sefulu fitu afe ma le ono).
O faamaumauga talu ai e 20 gasegase o le koviti ma o tagata uma nei sa maua ia latou suega na faia ae leai nisi na ulufale mai i le atunuu i o tatou tuaoi faavaomalo na maua o aafia i le faamai.
O loo tata logo pea masefau i le tala’iga faifaipea a le matagaluega o le soifua maloloina mo tagata o le tatou atunuu e tatau ona fai ni tuipuipui faaopoopo poo boosters, ma o loo avanoa ai falemai uma i le atunuu mo le faia o ia tuipuipui faapea ma tui mo i latou e lei faia muamua ni tuipuipui o le Koviti-19.
