E 44 sui tauva o le faigāpalota tele a le atunuu i le masina nei, o le a tauva o ni sui tuto’atasi.

O le 32 o ia sui tauva tuto’atasi ua fausia se latou mafutaga ma tapenapena ai mo le faigā filifiliga a o latou itumalo i le palota tele, ma ua tapena ai foi i se latou fuafuaga i se vaega faaupufai e lagolago iai pe a mae’a le palota e lē maua e se pati faaupufai e pei o le Samoa ua Potopoto, vaega e puipuia aiā tatau a tagata, le Faatuatua i le Atua Samoa ua Tasi, ma le Samoa Labour Party se numela o nofoa e fausia ai se faigāmalo fou.

O le feiloa’iga a tusitala ma nisi o sui tauva tuto’atasi e to’alua o le a tausinio i le nofoa o le itumalo faapalota o Aiga i le Tai na faailoa ai lea tapenaga.

O le susuga Leiataualesa Jerry Brunt o le ta’ita’ifono lea o le mafutaga a sui tauva tuto’atasi e 32 ua tapena faatasi nei mo le faigāpalota.

O le susuga Leiataualesa Jerry Brunt ua tutū faatasi ma le tasi o sui tauva tuto’atasi mo le tofi faaolioli o Aiga i le Tai le tofa Levaa Samoa James Utuva.

Ua la faailoa e poo ai lava o sui faatutū o le latou itumalo e manumalo i le nofoa o le a lagolago foi iai.

O sui tauva o le vaega e puipuia aiā tatau a tagata, ma le Faatuatua i le Atua Samoa ua Tasi o le a tauva mai ma ia tamalii faatasi ai ma se isi o sui tauva e to’alima ai sui tauva o Aiga i le Tai.

O le tofa Auapaau Mulipola Aloitafua Mulipola sa seei i le tofi faipule o le itumalo i le paeaiga 17 a le Palemene.

Sa filifilia ai e avea ma Sui Fofoga Fetalai o le fono aoao faitulafono a Samoa.

Ni finagalo o le susuga Leiataualesa Jerry Brunt ma le tofa Levaa Samoa James Utuva o sui tauva tuto’atasi mo le filifiliga a Aiga i le Tai.