Ua toe aumai i faalauiloa o ta’imua a le vaega faaupufai e puipuia aiā tatau a tagata se isi ana fuafuaga e autū lava i fesoasoani i le tau o le soifuaga, lea ua fuafua ai se vaegatupe e tusa ma le $32 miliona e faasafua i le tausaga ma ua faaigoaina o le SUPA.
O le faatinoga o lea fesoaasoani o le a siitia ai le faamanuiaga ta’i masina o tagata e iai aafiaga tumau mai le 100 tala i le taimi nei i le 300 tala i le masina.
Ua fuafua ai foi le maua o le 200 tala i le masina e le tagata o loo vaaia se tasi e iai aafiaga tumau, i latou e matuā mana’omia le vaaiga i taimi uma.
Ua iai foi le fuafuaga i le faaaluina o le 32 miliona i le tausaga o le tuuina atu o le tasi le afe tala i pepe fou uma e fananau i le tausaga o se seleni e fesoasoani ai i mātua i le tausiga, faapea le isi tasi le afe tala mo le tamaitiiti e to’atasi e mae’a lelei ona tuipuipui.
O le tasi o fesoasoani ua folafola e lea patī faaupufai e faatino i lalo lava o lea fuafuaga o le aveesea o le lafoga o oloa ma galuega faatino le VAGST tax mai le tau o mea’ai mana’omia e pei o mea’ai tuuapa e aofia ai le eleni poo le pilitati, alaisa, falaomata, butter, ma le pateta.
O le autū o le SUPA o le fesoasoani i le tau o le soifuaga ma ulugalii fou o loo tau amata le atina’e tamaiti.
O fuafuaga uma nei a le vaega faaupufai e puipuia aiā tatau a tagata ua latou fuafua e faataunuu i totonu o le selau aso muamua o lana pulegamalo pe afai manuia mai i le faigāpalota.
