Ua manino nei le taunuuga o le faigā filifiliga a le atunuu e ala i lana faigāpalota tele ina ua mae’a le faitauga aloa’ia.
O lea ua tula’i mai ai ua faamautū le manumālō a’ia’i o le vaega faaupufai o le Faatuatua i le Atua Samoa ua Tasi e 31 nofoa, vaega e puipuia aiā tatau a tagata e 14, le pati faaupufai o le Samoa ua Potopoto e 3 nofoa, ma le to’atolu o sui tauva tuto’atasi ua aloa’ia lo latou filifilia.
O le aofa’iga e 31 o nofoa ua manumālō ai le Faatuatua i le Atua Samoa ua Tasi ua aofia ai le nofoa o Palauli 2 lea na manumālō ai le sui tuto’atasi, le tofa Fiu Faaolatane Ponifasio Vasa.
O le numela atoa lea o nofoa o le a fausia ai le isi pulegamalo fou mo le isi 5 tausaga.
Ua mautū ai foi i lea faai’uga, o le sui faipule ua toe filifilia o le itumalo o Gagaifomauga 3 mai le motu tele i Salafai le susuga Laaulialemalietoa Leuatea Polataivao Fosi Schmidt, o le Palemia filifilia lea o le Malo ma le atunuu.
O le faato’ā toe pale lea o se itumalo i Puleono i le tofi Palemia o le Malo tuto’atasi o Samoa i le mavae o tausaga ma paea’iga a le Palemene sa avea ai se tasi o tamalii sa seei i le nofoa o le tofi faipule o Faasaleleaga 2, le ta’ita’i o le vaega faaupufai e puipuia aiā tatau a tagata i tausaga ua tuana’i le afioga i le Tootooalii, le afioga Tofilau Eti Alesana, ma Palemia o Samoa mo le umi e 14 tausaga.
Na ulua’i pale o ia i le tofi Palemia i le paea’iga o le tausaga e 1982 i le 1985, ma ia toe tauave lea lava tofiga o le malo mai le tausaga e 1988 se’ia oo ina faamavae i le tausaga e 1998.
Na sosoo ai ma le tauaveina o le tofi Palemia e le sui faipule o Lepa le susuga Tuilaepa Lupesoliai Sailele Malielegaoi mai lea tausaga 1998 se’ia oo i le tausaga e 2021, ma o se tofiga sa umia e se faipule i le motu o Upolu mo le umi e 22 tausaga.
Ua faamauina foi i talafaasolopito o faigāmalo a Samoa o ia le Palemia pito tele tausaga sa ia tauave ai lea tofiga.
O le Aso Gafua a sau ua faatulaga e faasilasila aloa’ia ai e le afioga i le Ao o le Malo le taunuuga aloa’ia o le faigāpalota sa alo iai le atunuu, ona faato’ā iloa ai lea o se aso e usuia ai le ulua’i tauaofiaga a le paeaiga lona 18 a le Palemene, o le a faatauto ai sui filifilia uma ma faailoa ai foi e le Palemia filifilia tofiga o lana pulega malo fou.
