E fai si tuga o manu’aga o se alii e 30 tausaga ua lipotia mai na fana e le tagata i se tasi foi vevesi ua alia’e mai i Sini. O le faalavelave na tupu i se fale I Roseland i Sini i le po anapo ma fai mai na faalogoina le pa pa ane o fana mai lea fale.
Maua atu e leoleo se alii ua faamanu’alia i lea lava fale, o loo iai faatasi ma ni tamaitai se toalua ma se alii, e ta’i 25 tausaga uma ma ua molia nei i le faalavelave e pei ona tulai mai.
Fai mai leoleo o le alii lea 25 tausaga na maua iai se naifi tulou ma tamaitai e toalua ua molia foi ma e tutulai i luma o le faamasinoga i le asō. Fai mai leoleo e lē o mailoa i le taimi nei pe iai se sootaga o lenei faalavelave ma vevesi a kegi o loo fai pea ma matauina i Sini aemaise o se suesuega tele na faia a leoleo na pu’eina ai tagata e to’a 18 i le vaiaso nei lava.
Fai mai sooupu a le matagaluega e oo mai i le taimi nei o loo su’e e leoleo le fana na faaaogāina i lea faalavelave.
