E tusa ma le 29 afe tālā le tau o faailoga faapitoa ua ofoina e le kamupani telefoni o le Vodafone Samoa mo alii ma tama’ita’i o le ‘autaalo a Samoa na manumālō i pine auro, siliva ma le apamemea i taaloga laiti a le Pasefika na faia talu ai nei i le atunuu o Palau.
O le Aso Tofi o lenei vaiaso na faatino ai e lea kamupani se tufatufaga o ia faailoga faapitoa poo special awards lea na faaalia ai e le Pule Sili o le Vodafone Samoa, e tasi le afe tālā le pepa tala oloa mo i latou na maua pine auro, 750 tālā mo i latou na manumālō i pine siliva ae 500 tālā le pepa tala oloa mo sui o le ‘autaalo a Samoa na manumālō i le pine apamemea.
Faaalia e le Pule Sili o le kamupani e lē o ni tupe e maua ae o le pepa poo le voucher e aga’i ai i latou ua faamanuiaina i soo se faleoloa o le Vodafone i Samoa e faatau ai telefoni taugatā ma isi oloa a le kamupani.
E 61 le aofa’iga o pine a Samoa na manumālō ai i ia taaloga a le Pasefika.
