Ua lima nei vaiaso o galulue i le matāgaluega o le soifua mālōlōina i Samoa le ‘aumalaga e to’a luasefuluvalu e aofia ai ni alii ma tama’ita’i e iai poto faapitoa i galuega faasoifua mālōlōina i le tomai faafoma’i ma tausi soifua i Niu Sila.
Ua faailoa e le ofisa o le Komesina Maualuga o le malo o Niu Sila i Samoa le galulue faatasi o ia tausi soifua ma foma’i mai Aotearoa ma le to’afā o alii foi ma tama’ita’i foma’i mai Ausetalia.
O le autū o lea galuega fesoasoani o le togafitia o gasegase o le fiva o ponaivi le dengue fever.
E 300 afe tala Samoa le isi fesoasoani a Niu Sila ua faatau ai oloa mo galuega faafoma’i e fesoasoani ai i le matāgaluega o le soifua mālōlōina i lo tatou atunuu ma o nisi o ia oloa na faatau o masini e faia ai su’ega poo test o le toto e maua ai faamaoniga o le aafia o se tagata i le vairusi o le fiva o ponaivi.
E le’i toe maua mai se faamatalaga i se lipoti lata mai a le komiti o faalavelave faafuase’i a le malo pe o faaauau le faaitiitia o le pepesi o lea faama’i.
O lea taumafaiga e pei ona faailoa e le ofisa o le Komesina Maualuga o le malo o Niu Sila i Apia e atagia ai le galulue faatasi o le Malo o Niu Sila ma Ausetalia e ofoina mai le fesoasoani mo le tatou atunuu a o feagai ai ma lenei vaitau faigatā i le pepesi o le dengue fever.
E lē gata i lea, ae atagia ai foi le faamausalī ai o le faanaunauta’iga o le malo o Niu Sila ina ia mauaa a latou faigāpaaga ma sootaga ma le malo o Samoa.
