O le faiga paaga a le pulega o le suāvai a le malo ma le Ekalesia a Iesu Keriso o le Au Paia o Aso e Gata ai, ua mafai ona faatupe ai i le tau e silia i le $261,000 le galuega o le fausia o ni tane tetele e teu ai le suāvai ma faasoasoa atu i aiga o le itumalo o Falealupo.

O se tasi lea o itumalo faapalota i lea itu o le motu tele i Salafai e faaletonu tele le suāvai.

O le tatalaina o le galuega sa auai le Minisita o Galuega Tetele ma Fela’ua’iga e aofia ai le pulega o le suāvai, o le sui Faipule o le itumalo, ma sui o le ekalesia sa galulue faatasi ma le pulega o le suāvai i le faatupeina o lea galuega tāua.

O tane vai e fā e mafai ona teu ai le 10 afe lita, fausia o fale e tuu ai ia tane vai, fausia o le pa uaea faatamilo i le nofoaga o ia tanevai, faapipiiina o pamuvai, fausia o solar panel e maua ai le eletise e ola ai pamuvai, faapea le ta’iina o ofe paipa mo aiga e 13 ua fausia i lea galuega.

Le Minisita o Galuega Tetele ma Fela’ua’iga e aofia ai le pulega o le suāvai, le tofa Olo Fiti Afoa Vaai i le saunoaga na tatala ai le galuega o le suāvai mo le itumalo o Falealupo.