O faamaumauga lata mai o tagatānuu Samoa o alala i fafo atu o le atunuu ua lesitala mo le palota tele, ua faailoa ai i ia faamaumauga talu mai le ta o le 12 o le aoauli o le Aso Gafua o le vaiaso nei, e 302 tagata sa faaaogā fesoota’iga faaonaponei e lesitala ai, peita’i e 248 e le’i mae’a pe incomplete, ae na o le 54 tagata ua mautū uma a latou lesitala.

Mo lesitala e le’i mae’a ona e le’i faatinoina isi aiaiga mana’omia e pei o le malaga mai i Samoa e faia ai tulagalima ma pu’e le ata o Ausetalia e 67 tagata e le’i mae’a ona lesitala, Niu Sila e 143, o Fiti e 8, Iapani e 2, Amerika e 19, Tonga e 2, ma atunuu o Filipaina, Solomona, Tunisia ma Tuvalu e ta’itasi tagata sa lesitala mai ai e le’i mae’a.

Talu mai le itula e 12 o le aoauli o le Aso Gafua o le vaiaso nei ua oo atu le numela o tagata ua mae’a ona lesitala mo le faigāpalota ia Aokuso i le 93,559 poo le 79.8 pasene.

O loo tulituli e le ofisa o le komisi o faigāpalota le 95 pasene o tagata e tatau ona lesitala, mai le aofa’iga e 117,225 o tagata palota e agavaa ona lesitala.