E 24 itumalo palota ua na o le vaega tupe muamua fituselau afe tālā o le tufatufaga o le miliona lona tolu ua faamatuu iai, ma o loo totoe ai a latou vaegatupe mulimuli ta’i tolu selau afe tālā e le’i tuuina atu iai.
O faamaumauga ia ua tuuina mai e le Ofisa Sili o le Matāgaluega o Tina ma Tama’ita’i Atina’e o Afio’aga ma Aga Fesoota’i ina ua fesoota’i iai.
Ua faailoa mai ai foi ma le aofa’iga e 26 o itumalo ua mae’a ona faamatuu uma iai vaegatupe o le miliona lona tolu, poo se aofa’iga e 26 miliona tālā ua tafe atu i le faataamilosaga o tupe o le tamaoaiga o le atunuu.
Ua totoe ai le itumalo e tasi o loo faatali nisi o faamaumauga mana’omia ona faato’ā maua lea o vaegatupe faatulagaina mo le tufatufaga lona tolu o ta’i miliona e ese ai le 200 afe tālā na muamua faamatuu i Fono Faavae a itumalo e 51 i le amataga o le poloketi ua savalia nei le fā tausaga talu ona faagaioi e le malo.
O le masina nei o le a amata ai ona savalia e le vaega o vaaia lenei taumafaiga ofisa o Fono Faavae mo le asia o atina’e ua mae’a ona faamaonia mo le faaaluina iai o vaegatupe.
O le 24 o itumalo e le’i maua le 3 selau afe e iai le talitonuga o le a teu i le teugatupe faapitoa le special purpose account e faatali ai le mae’a o le palota tele ma tula’i mai se faigāmalo fou e faaauauina le faamatuu iai o latou vaegatupe mulimuli o le miliona lona tolu.
