Ua silia i le lua selau afe tala tupe ua maua i sa’iliga seleni ma meaalofa ua tauaao e le kalapu lakapi a le afio’aga o Moataa auā le tapenaga o le faailogaina o le 100 tausaga o le taaloga lakapi i totonu o le nuu, e pei ona fausia ai se maota e avea ma club house e pine faamau ai le 100 tausaga o le a faailoga i le masina fou o Iuni.
O le Aso Gafua a sau e umusa ma tatala ai lea galuega ua fausia i le nofoaga o loo iai le malae lakapi a Moataa, lea e ui atu ai le auala e tau i le faletalimalo lauiloa o le Taumeasina Island Resort.
O le Aso Lua a sau e faatino ai se savali a aulakapi uma o le a tausinio i le taamilosaga lakapi fitu o se tasi o polokalame tāua o le selau tausaga lea o le a faia i le taulaga o Apia ma o le a saunoa ai le tamaitai Palemia i le sauniga i luma maota o le Malo i le eleele fou pe a taunuu lea savali.
Le Faatonu o le taamilosaga lakapi ta’ito’afitu o le selau tausaga o le kalapu lakapi a Moataa le susuga Falepauga Filipo Saena.
O le lagolago autū o le selau tausaga ma ona polokalame o le kamupani a se tasi o tamafanau a le nuu ua lauiloa i le lalolagi o le lakapi, le susuga Laauli Michael Jones.
