O le molimauina o le to’ulu o timuga i Samoa i le Aso Gafua o le vaiaso nei i se taimi o le afiafi, ae to’ulu ane ai i Lotofaga ma le timu ‘aisa e pei ni maamaa le lapopo’a, o se vaaiga e lē masani ai lo tatou atunuu e vevela ma māfanafana lona tau.
O le tausaga e 2011 sa iai foi ni vaaiga faapea i le taimi na to’ulu ai foi timuga i se vaega o Tiavi, faapea ma le tausaga e 2016 i Savaii i nuu o Satupaitea ma Vaitoomuli.
Ua faailoa e le Ofisa Sili Lagolago o le ofisa vaaitau a Samoa o se isi lea o molimau i suiga o le tau ua aafia ai le lalolagi, ae o le timu aisa sa molimauina e māfua mai i ao faaniutū.
Le Ofisa Sili Lagolago o le vaaitau le susuga Afaese Dr Luteru Tauvale i sona finagalo i le leitio ma le TV9 a le malo.
O ata video na pu’e ai ata o le timu ‘aisa i Lotofaga sa molimauina e le to’atele i faasalalauga i luga o le api o foliga.
