Ua talafeagai ma fetaui le taimi o le foa’i a le kamupani agalelei o le Island Rock i moega fou e 20, ma le tele o gasegase ua taofia i le falema’i i Motootua ma Tuasivi ona o le pepesi o le faama’i fiva o ponaivi.
O le pulega o lea kamupani sa malaga i Salafai i le Aso Lua o lenei vaiaso ma sui tusitala o auaunaga tau faasalalauga eseese i lo tatou atunuu, e molimauina le tuuina atu o le 10 moega fou i le maota gasegase o Malietoa Tanumafili II i Tuasivi.
E 10 foi moega fou sa muamua tauaao atu e le kamupani i le maota gasegase o Tupua Tamasese Meaole i Motootua i le vaiaso ua mavae.
O se tasi lea o mana’oga sili ona tāua mo auaunaga a le soifua mālōlōina i le atunuu o moega lelei e faaaogā e gasegase.
O moega fou foi ua foa’i e le Island Rock e iai le talitonuga ua sui ai nisi o moega ua faaletonu.
