O le faaaogāina o auala o fesoota’iga tau initaneti e lesitala ai tagata mo le palota ua faailoa i faamaumauga a le ofisa o le komisi o faigāpalota talu mai le po o le Aso Lua o le vaiaso nei, e mai le aofa’iga e 3,716 o tagata na lesitala i luga o ia fesoota’iga e na o le 18 tagata na lesitala mai atunuu i fafo ua mautū ma faamalieina aiaiga uma o le avea ai ma tagata palota.
I le sefuluvalu lea e to’avalu tagata i Niu Sila, to’alua mai Amerika, ae ta’itasi mai atunuu o San Marino, Filipaina, Moldova, o Fiti, ae to’alua i Amerika Samoa to’alua foi ua mae’a lesitala mai Ausetalia.
O le isi vaega to’atele ua mautū lesitala sa faatino i luga o fesoota’iga tau initaneti e 3.698 o tagata i totonu lava o Samoa.
I le tulaga lata mai o le lesitala o loo faagasolo mo itumalo faapalota e 51 mo i latou o nonofo i Samoa i le taimi nei, o itumalo faapalota tetele i le Vaimauga ma Faleata ua ausia e nisi itumalo le 60 ma le 50 pasene o le aofa’iga o tagata e tatau ona lesitala, peita’i o Faleata 3 faato’ā silia laitiiti ma le 40 pasene e fua i le aofa’iga o tagata palota e tatau ona lesitala e 4,945.
O faamaumauga mai le po o le Aso Lua o le vaiaso nei faato’ā 2,037 tagata palota ua mae’a ona lesitala.
O le itumalo o Faleata 1 i le aofa’iga e 7,701 tagata e tatau ona lesitala o lea faato’ā ausia le aofa’iga e 3,678.
E faapena le itumalo faapalota o Vaimauga 3 e 6,295 tagata palota e agavaa ae o lea faato’ā ausia le numela e 3,340 o tagata ua maea ona lesitala.
E iai le talitonuga ua iai se suiga i ia fuainumela ona o loo tatala pea le lesitala o tagata e agavaa ona palota.
E lua afe tala le salatupe pe a lē faia le lesitala, ae selau tala le faasalaga pe a lē faatinoina le palota.
