I le faaauau ai pea o le tuuina mai o talosaga mo le sitiseni Niu Sila mo tamā ma tinā o tagatānuu Samoa na soifua mai i le aso 13 o Me i le tausaga 1924 aga’i i le aso muamua (1) o Ianuari o le tausaga 1949.
O lea ua faamaonia e tauala mai i se lipoti lata mai a le ofisa o le NZ Internal Affairs, e oo mai i le aso 30 o Aperila i le tausaga nei 2025 ua oo atu nei i le 1,894 talosaga ua taulimaina e le DIA.
Mai lea numera o talosga e 1,666 talosaga ua faamanuiaina, 11 e le’i manuia po ua toe faaui i tua, ma le 217 o talosaga o loo faatino iai iloiloga i le taimi nei.
Ua faamauina foi le tuufaatasia ai o se faalapotopotoga ua ta’ua o le Faliu le La Support Group, o loo faamaopoopo e le ASA Foundation, i le naunauta’iga e fesoasoani i nai aiga o loo iai tuaā ua faamanuiaina i le sitiseni Niu Sila i ni faamatalaga i faamanuiaga e agavaa ai i latou i le mae’a faatino ai o a latou talosaga ma ua manuia.
Faaalia foi, o le a faatino se faatasiga a le Faliu le La Support Group i le Aso Gafua, 7 o Iulai mai le itula e 10 i le taeao aga’i i le 1 i le aoauli mo tuaā uma ua manuia i le sitiseni o loo alaala ma pāpāaao i Aukilani nei, e talanoaina vaega uma e agavaa ai i latou mai lea faamanuiaga.
O le a faia lea faatasiga i le Manurewa Sports Centre.
