O le faigā filifiliga a Samoa i lenei Aso Faraile e ala i lana palota tele ua faatulaga mai ai sui tauva e 187 o le a faia iai le filifiliga a itumalo faapalota e 50 lea e 20 i Savaii ae 30 i Upolu.

I Upolu e 115 le aofaigā o sui tauva o le a faia iai le filifiliga a tagata palota e 70,232.

E iva itumalo i Tumua e ta’i lima sui tauva, e sefulu itumalo e ta’i 4 sui tauva, e 8 itumalo e ta’i tolu sui faatutū ae tolu foi itumalo e na o le ta’i lua sui tauva e faia iai le filifiliga.

O le motu o Savaii ua faamauina e lua itumalo e to’aono sui faatutū mo a latou faigā filifiliga e aofia ai Palauli 2 ma Gagaifomauga 2.

E lua itumalo e ta’i lima sui tauva, e lima itumalo e ta’i fā sui tauva, e valu itumalo e ta’i tolu sui tauva, ae lua itumalo e ta’i lua sui tauva.

Ua faailoa e le Komesina o faigāpalota e 430 falepalota o le a faia ai le faigā filifiliga a le atunuu ma o ia falepalota uma, o le a iai ma pusa palota mo le faia o palota faapitoa poo special votes.

O le a faaaogā lea avanoa mo tagata palota o loo alala ma nonofo mamao ese ma itumalo o loo lesitala ai, aemaise lava tagata palota i Savaii o loo nonofo i soo se itu o Upolu ae faapea foi tagata palota i Upolu o loo faamautū i Savaii.

O le Aso Toonai pe a mae’a le Aso Faraile o le palota tele o le a tala’i ai pusa o palota faapitoa ma faavasega itumalo e alu tonu iai ia palota, ae lē faitauina ai.

E faato’ā faatino lea galuega i le aso e faia ai le faitauga aloa’ia le Aso Gafua lea o le vaiaso fou.