O se alii pagota o loo tuli lona faasalaga 12 tausaga ma le 6 masina i solitulafono o le faiaiga faamalosi i se teineititi 13 tausaga lea sa faamaonia ia Tesema o le tausaga e 2022, ua toe faaopoopo le isi faasalaga i le falepuipui e 17 tausaga ona o se isi foi solitulafono tau faiaiga faamalosi na aafia ai se teneititi 19 tausaga le matua.

O lē na aafia i le solitulafono ua nofo ma faamautū nei i Amerika Samoa e mafua mai i le gaioiga a lē ua molia.

Faaalia i le faai’uga tusitusia a le faamasinoga o Elame Elame poo Totive Elame o Nono’a Saleimoa sa ia afea le fale o se aiga i Utualii uta ma ia faia ai se gaioiga taufaasese, na ia fai ai i le aiga o ia e faigaluega i se kamupani fau auala.

Sa ia fai i se tasi o le aiga o le tinā lea o le teineitiiti na aafia, o loo fia faalalo laau e aafia i le suaina o le auala ae mana’omia se tagata matua o le aiga la te o e saini ane tupe o meatotō ma laau aogā o loo aafia i le suaina o le auala.

Na fai ai le tinā i lana tama teine matua e o ma le alii o Elame, ma sa savavali ai i se auala i uta o Saleimoa ma le tala a lē ua nofosala i le teineititi, e la te o i uta o loo iai le latou pule e maua ane ai le tupe.

Peita’i o le avanoa lea na faatino ai e lea taulealea le solitulafono o le faiaiga faamalosi.

Ina ua maua le avanoa o lē na aafia e sola ese ai sa ia alu loa ma ta’u i lo latou aiga le mea na tupu ma logo ai leoleo.

Ua faatonuina e le faamasinoga i lana faai’uga le faamauina o le suafa o Elame Elame poo Totive Elame i le lesitala o tagata e faamaonia solitulafono tau faiaiga faamalosi.