Ua na o le 96 tagata palota o le itumalo faapalota o Falealupo sa fesiligia o latou agavaa e lesitala ai i le lola a lea itumalo ae lē silia i le to’a selau.
Ua toe faasa’o e le Komesina o faigāpalota lea fuainumela i le feiloaiga ta’i vaiaso ma tusitala i le Aso Lulu o le vaiaso nei, ma ia faailoa ai mai le 96 o tagata palota sa fesiligia le agavaa ua talia le lesitala ai i le lola a lea itumalo o le 80 ae o le isi 16 o loo iloilo pea.
O se galuega ua faaalia e le Komesina o faigāpalota le afioga Toleafoa Tuiafelolo Alexander John Stanley, o le a iloa i lea iloiloga pe faaauau ai se tagi e tuuina atu i le faamasinoga.
E 48 itumalo faapalota ua mae’a ona iloilo a latou lola ae tolu itumalo o loo tau faamae’a e aofia ai le itumalo palota o Siumu, o Safata 1 ma Safata 2.
Ua faailoa e le Komesina o faigāpalota e tatau ona mae’a le iloiloina o lola a ia itumalo i le faai’uga o le vaiaso nei.
O le Aso Tofi na maua ai lola palota le tumau mo itumalo e 48 ua mae’a ona faia iai iloiloga.
O lola mautū ua fuafua o le Aso Faraile a sau le aso 8 oo Aokuso e tatau ona maua ai mo le faaaogāina e sui faatutū ma latou komiti.
