E 16 tagata o loo lesitala i le lola palota a le itumalo o Falealupo o le a tutula’i i le Faamasinoga Faaitumalo i le Aso Faraile nei, e tali i moliaga mai nisi o tagata palota o lea itumalo faapalota i Savaii ua latou tuua’ia le agavaa o le lesitala o ia tagata e sefuluono i le lola palota a Falealupo.

Ua faailoa lautele e le ofisa o le komisi o faigāpalota i lana upega tafa’ilagi suafa o ia tagata, ma ua poloa’iina ai le tatau ona oo i le faamasinoga i le Aso Faraile i le 10 i le taeao e tali i le tuua’iga e lē tatau ona lesitala i latou o ni tagata palota o lea itumalo.

E 96 tagata palota o Falealupo sa fesiligia le agavaa ma faia iai le iloiloga, lea ua totoe mai ai le 16 ua molia i le faamasinoga.