O le faafoe o se taavale e se tagata e aunoa ma le umia o se laisene avetaavale, o se solitulafono matuiā, ma afai ae faia se faai’uga a le faamasinoga e tuu avanoa ai i se tagata e molia ma faamaonia i le avetaavale faatamala na maliu ai se tagata pe faamanu’alia, ae o le avetaavale e leai se laisene, o le a avatu ai se fe’au lē sa’o e ta’ita’i sesē ai mafaufau o tagata ma faapea ai, e lē afaina i le tulafono le ave o le taavale e leai se laisene.
O le silasila lea a le faamasinoga i sana faai’uga na fofogaina i le Aso Lua o le vaiaso nei, na faasala ai i le falepuipui i le 16 masina se alii 24 tausaga le matua, na ia ioeina moliaga o le avetaavale faatamala na maliu ai lona tuaa tamā ua 58 tausaga le matua o le soifua.
Sa ioe foi Perive Leuluaialii Ioane Salesa o se tane o Salailua i le moliaga o le avetaavale faatamala na mafua ai ona oo ni manu’a i le uso o lona tamā.
O Ianuari o le tausaga nei 2024 sa faafoe ai e lē ua molia le taavale a le latou aiga ona o le faatonuga a lona tamā, sa malaga ai mai Salailua i Salelologa lea sa malaga ai lona tamā ma lona uso ma le atalii o le uso o lona tamā sa fia oo i le uafu e toe malaga ai i Upolu.
O se vaega o le alatele i Gataivai na lavea ai le taavale ina ua oso i tua alu atu so’a se laau.
Sa faaalia e le loia sa tula’i mo Perive na moe lē ua molia, o le mafuaaga lea o le faalavelave.
Na mafua ona moe ona ua vaivai ua lē lava le mālōlōga ona sa alu le isi ao ma le po o feagai Perive ma gasesega o mea’ai ona o saofa’i a lo latou aiga na fai i le taeao o le aso na tupu ai le faalavelave.
E ioe le faamasinoga sa iai aafiaga o le lēlavā ma le vaivai o lē ua molia e fesoota’i i le faalavelave, peitai sa lē tatau ona ave e lē ua molia le taavale ona e lē gata ua vaivai ae e leai sona laisene e faataga ai ona ia umia faaletulafono le foeuli o le taavale.
O le 16 masina ua nofosala ai i le falepuipui lē ua molia, ua faatonuina ai e le faamasinoga a mae’a tuli lona faasalaga lea, e lē mafai ona ia toe aveina se taavale mo le umi e 3 tausaga.
E faato’ā mafai ona alu e fai sona laisene avetaavale e tusa o aiaiga o le tulafono, pe a mae’a le 3 tausaga.
