O le 3 afe o avanoa mai atunuu o le Pasefika ua latou talia e auai i le polokalame a le malo o Ausetalia e talosaga ai i ni visa e nonofo ai i lea atunuu ma faigaluega, ma ulufale ai foi i a’oa’oga, o Samoa e 150 avanoa na te maua i lea aofa’iga.

Ua faailoa e le Minisita o Tupe o le malo tausi le afioga Lautimuia Uelese Vaai i auala o fesoota’iga a le malo, o lea polokalame o le a tāua tele mo Samoa i le tulaga tau i tupe faamomoli, ma siitia ai le sootaga lelei o tagata Samoa o aumau ma faamautū i atunuu i fafo.

O le Pacific Engagement Visa o se polokalame a lea malo sa iloilo toto’a e le malo o Samoa ina ua faato’ā faailoa i le tausaga na te’a nei, ae o lea ua tatou talia i le amata ai o le vaega lona lua o le polokalame mo le tausaga 2025 i le 2026.

E mafai ona maua ai avanoa faigaluega mo ni taimi pupuu poo le uumi foi ae e aiaia le toe foi mai i Samoa, peita’i e avanoa ai i le polokalame ona talosaga e nofomau i totonu o Ausetalia e pei o le polokalame nofomau a Niu Sila o loo agavaa iai tagatānuu o Samoa i tausaga ta’itasi.